Ólafur Ragnar Grímsson, gef kost á þér áfram sem forseti Íslands !

 

Jón Sigurðsson	Áskorun til forseta  Íslands	Peningastefnan	Icesave-vextir	Áskorun til forseta  Íslands	Icesave-vextir
Stjórnarskráin	Áskorun til forseta  Íslands	Peningastefnan	Icesave-vextir	Áskorun til forseta  Íslands	Icesave-vextir

 

  

Samstaða þjóðar    NATIONAL UNITY COALITION                                                               Baráttusamtök fyrir sjálfstæðu ríki á Íslandi    og fullveldisréttindum almennings.    Stöndum vörð um Stjórnarskrá Lýðveldisins.

  

   

    

Ólafur Ragnar Grímsson, gef kost á þér áfram sem forseti Íslands !

 

Ávarp að Bessastöðum 27. febrúar 2012.

 

Guðni Ágústsson fyrrum ráðherra.

 

  

   

Forseti Íslands Ólafur Ragnar Grímsson !

Erindi dagsins er að færa þér undirskriftir úr rafrænni undirskriftarsöfnun sem hófst 20 janúar s.l. Áskorun til forseta Íslands. Ég færi þér þrjátíu þúsund tvö hundruð áttatíu og sjö undirskriftir ennfremur tvö hundruð áttatíu og sex nöfn sem hafa fengið á sig skekkju í innslætti en eru að öðru leyti rétt alls þrjátíu þúsund sjö hundruð sjötíu og þrír Íslendingar skora á þig til framboðs.

Allir þeir einstaklingar sem hafa gengt okkar æðsta embætti að vera kjörnir forseti Íslands hafa á erfiðum tímum náð til þjóðar sinnar og gengt veigamiklu hlutverki í gleði og sorg svo ekki sé talað um í erfiðleikum fólksins í landinu. Fundið til í stormum sinnar tíðar. Talað með þeim hætti á stórum stundum að það skipti máli. Sú undirskriftasöfnun sem við færum þér í dag Ólafur Ragnar Grímsson snýst um traust reynslu og forystuhæfileika.

Við höfum verið að ganga í gegnum tíma þar sem allt hefur virzt á hverfandi hveli. Ekki bara hér á Íslandi heldur um hinn vestræna heim. Mikil átök og miklar breytingar eru framundan og óvissutímar. Starf og hlutverk forseta Íslands hefur aldrei verið að sitja hjá eða vera svo hlutlaus að erfiðleikar fólksins og landsins komi ekki inná hans borð. Þegar Ísland hrundi í efnahagslegum hamförum haustið 2008 var svart yfir sorgarranni. Þá skiptu neyðarlögin sem sett voru á Alþingi miklu máli. Og nú er Ísland farið að rísa og komið í nokkurt var.

  

Heimsins brestur hjálparlið

hugur skerst af ergi

Þegar mest ég þurfti við

þá voru flestir hvergi.          (Friðrik Jónsson frá Halldórsstöðum í Reykjadal í Suður-Þingeyjarsýslu.)

  

Þessi magnaða vísa lýsir best því ástandi sem hér ríkti um nokkurt skeið.

En þáttur þinn forseti Íslands og í hvaða stól þú varst við þessar aðstæður skipti miklu máli. Þegar tómarúm hafði myndast og málsvörn Íslands var lítil sem engin, ekki sízt á erlendum vettvangi. Saklaus vopnlaus þjóð var beitt hryðjuverkalögum af einni stærstu þjóð Evrópusambandsins og NATÓ. Þá skipti málsvörn þín erlendis miklu máli. Og með framgöngu þinni má segja að þú hafir snúið vörn í sókn.

Þetta stríð Bretanna var verra en öll landhelgisstríðin til samans. Enn meira máli skipti að okkar mati sú ákvörðun þín í Icesave-málinu að þú beittir því valdi sem forseta er falið samkvæmt stjórnarskrá að beita 26. greininni og fela þjóðinni að kjósa í tvígang um umdeildasta samning Íslandssögunnar. Sem hún hafnaði eftirminnilega.  Hún neitaði að taka á sig og framtíðina skuldir einkabanka og óreiðumanna.

Þessi ákvörðun var mikilvæg hún snýr bæði að lýðræði og mannréttindum um allan heim. Eftir henni var tekið og hún er leiðarljós í baráttu gegn græðgi og ósvífni. Það er af þessum ástæðum meðal annars sem stór hluti þjóðarinnar treystir þér og sá hópur er reyndar miklu stærri en skráðu nafn sitt á áskorunarlistann. Þetta er stærsta og fjölmennasta áskorun sem fram hefur farið þar sem skorað er á einstakling í landinu.

Nú þurfum við Íslendingar að brúa allar brýr sem mynduðust í hruninu og róa á bæði borð. Ísland á ærinn auð og gnægð tækifæra sem forseti vor hefur talað fyrir heima og erlendis. Við þökkum einnig þær guðsgjafir sem okkur hafa borist. Bóndinn framleiðir matvæli sem aldrei fyrr í háum gæðum. Makríll gekk í landhelgina loðnan meiri en áður. Og þorskur á miðunum í stærra mæli en menn muna og við höfum ekki samstöðu til að veiða meira. Svo segja þeir að olía sé fundin á Drekasvæðinu. En verkefni dagsins hér á Bessastöðum er það eitt að færa þér nöfn um þrjátíu og eitt þúsund Íslendinga sem skora á þig í framboð í sumar.

Við teljum mikilvægt traustsins vegna og starfa þinna vegna ekki síst á tímum óvissu og átaka að þú gefir kost á þér áfram sem forseti Íslands.

Það er ljóst að á allra næstu árum verða umbrotatímar á Íslandi og í veröldinni. Það er því mikilvægt að reynsla þín og forystu hæfileikar nýtist íslendskri þjóð.

 

      

 

>>><<<

                                                                                

 Heimsins brestur hjálparlið

hugur skerst af ergi.

Þegar mest ég þurfti við

þá voru flestir hvergi.

 

>>><<<