Áskorun á Ólaf Ragnar Grímsson forseta

 

 

Samstaða þjóðar    NATIONAL UNITY COALITION                                                               Baráttusamtök fyrir fullveldisrétti almennings og sjálfstæði Íslands.    Stöndum vörð um Stjórnarskrá Lýðveldisins.

 

Áskorun á Ólaf Ragnar Grímsson forseta
 

Fyrst birt í Morgunblaðinu 24. janúar 2012.
  

Guðni Ágústsson

 

Aldrei hefur undirskriftasöfnun eða áskorun farið jafnvel af stað og nú hvað varðar að Ólafur Ragnar Grímsson gefi kost á sér í eitt kjörtímabil í viðbót sem forseti Íslands. Ástæður þessa eru margar en fyrst og fremst þær að hann hefur reynst mikilvægur málsvari þjóðar sinnar veitt öryggi og traust á tímum sundrungar og reiði hér innanlands. Málflutningur hans hefur reynst mikilvægur bæði innanlands og ekki síður erlendis og þá sérstaklega í Evrópu. Við höfum átt í illvígum deilum við Breta og Hollendinga og nú Evrópusambandið út af Icesave-skuldum sem okkur sem þjóð bar aldrei að borga. Ég bið þig að fara inn á Áskorun til forseta Íslands  og styðja þúsundir manna í grasrót samfélagsins um að skora á forsetann að gefa kost á sér í eitt kjörtímabil enn.

 

Ólafur Ragnar þorir. 

Ólafur Ragnar Grímsson hefur verið forseti sem hefur þorað að taka ákvarðanir og tala máli Íslendinga á erlendri grundu í erfiðustu málum samtímans. Við skulum viðurkenna að þar fyllti hann upp í tómarúm þar sem stjórnmálamennirnir og forystumenn landsins hikuðu.

  

Enginn gleymir hvernig hann tókst á við Bretana út af hryðjuverkalögunum sem þeir settu á Ísland. Hann virkjaði síðan 26. gr. stjórnarskrárinnar á neyðarstundu í Icesave-málinu. Og þjóðin fékk tækifæri til að hafna að borga skuldir óreiðumanna og einkabanka í tvígang. Lýðræðislegt afrek sem margar aðrar þjóðir virða og þakka íslensku þjóðinni fyrir í dag. Yfirgangur og frekja fjármálamannanna geisar víðar en hér. Hún er harðvítug um allan hinn vestrænaheim. Þeir vilja græða þegar vel gengur en alþýðan skal taka við ósómanum þegar allt hrynur af þeirra völdum.

  

Lýðræðisleg átök eru framundan.

Ólafur Ragnar Grímsson er lýðræðissinni, góður málsvari þjóðar sinnar inn á við og ekki síður út á við. Á tímum óvissu og pólitískrar upplausnar bæði hér og um veröld alla, er mikilvægt að hann gegni forsetaembættinu áfram.

  

Framundan eru átök um stjórnarskrá, þjóðaratkvæðagreiðslur um stöðu Alþingis og hlutverk forsetaembættisins. Átök um aðild að Evrópusambandinu - glímunni við yfirþjóðlegt vald. Því skora ég á alla Íslendinga að skrifa undir áskorun á forsetann að gefa kost á sér til starfa á Bessastöðum næsta kjörtímabil.

  

Við þurfum mann í forsetaembættið sem þorir að grípa til öryggis-ventilsins

og tala máli þjóðarinnar nú sem aldrei fyrr.

  

Óskum þess að Ólafur Ragnar Grímsson verði forseti Íslands áfram.

 

Ólafur Ragnar Grímsson hefur verið forseti sem hefur þorað

að taka ákvarðanir og tala máli Íslendinga á erlendri grundu

í erfiðustu málum samtímans.