Áróðursmálaráðuneyti Evrópusambandsins er að Efstaleiti 1

  

 

Samstaða þjóðar    NATIONAL UNITY COALITION                                                               Baráttusamtök fyrir fullveldisrétti almennings og sjálfstæði Íslands.    Stöndum vörð um Stjórnarskrá Lýðveldisins.

  

    

Áróðursmálaráðuneyti Evrópusambandsins er að Efstaleiti 1

  

Fyrst birt í Morgunblaðinu 14. janúar 2012.

  
Loftur Altice Þorsteinsson
  
Varla hefur það farið fram hjá nokkrum manni, að fyrir mörgum árum kom Evrópusambandið (ESB) sér upp áróðursmálaráðuneyti á Íslandi og er það staðsett í Efstaleiti 1. Nánar tilgreint var þetta árið 2005 þegar Evrópusinninn Þorgerður Katrín Gunnarsdóttir réð Evrópusinnann Pál Magnússon til að gegna ráðherrastarfinu og fór þar að ábendingu Evrópusinnans Þorsteins Pálssonar. Í Brussel hefur ríkt mikil ánægja með ráðherrann, enda óvíða beitt harðari takmörkunum á málfrelsi en hjá RÚV (Ríkisútvarpinu).

  
Þjónkun Ríkisútvarpsins við Evrópusambandið.
RÚV hefur þá stefnu að útiloka alla gagnrýni á Evrópusambandið. Þeir sem ekki eru fylgismenn ESB eru ekki bara útilokaðir frá að koma málstað sínum á framfæri í dagskrárþáttum RÚV, heldur upplifa þeir ástandið þannig að starfsmenn RÚV noti hvert tækifæri til að níða af þeim mannorðið. Að engu er getið fréttatilkynninga frá samtökum andstæðinga Evrópusambandsins, hvað þá að þær séu birtar. 
 
Vefslóð: http://samstada-thjodar.blog.is/blog/samstada-thjodar/entry/1215255/ 

Einnig hefur Áróðursmálaráðuneyti Evrópusambandsins þá stefnu að svara engum kvörtunum frá andstæðingum ESB og ábendingum um ítrekuð brot á útvarpslögum (lög 6/2007) er látið ósvarað. Til upprifjunar fyrir lesendur má minna á, að verkefni RÚV er að reka útvarpsþjónustu í almannaþágu. Samkvæmt lögum um Ríkisútvarpið felur þetta meðal annars í sér eftirfarandi:

5. grein. Að halda í heiðri lýðræðislegar grundvallarreglur og mannréttindi og frelsi til orðs og skoðana. Gæta skal fyllstu óhlutdrægni í frásögn, túlkun og dagskrárgerð.

7. grein. Að veita víðtæka, áreiðanlega, almenna og hlutlæga fréttaþjónustu um innlend og erlend málefni líðandi stundar og vera vettvangur fyrir mismunandi skoðanir á málum sem efst eru á baugi hverju sinni eða almenning varða.

 
Framangreind ákvæði útvarpslaganna eru daglega þverbrotin og sérstaklega leggur RÚV sig fram um að »gæta EKKI fyllstu óhlutdrægni« og að »veita EKKI hlutlæga fréttaþjónustu«. Að auki er regla hjá Áróðurmálaráðuneyti Evrópusambandsins að »halda EKKI í heiðri frelsi til skoðana« og að »vera EKKI vettvangur fyrir mismunandi skoðanir«. Allir landsmenn hafa orðið vitni að þessum brotum, í tengslum við umræðu um lýðræði í landinu, sjálfstæði Íslands og Icesave-kröfur evrópskra nýlenduvelda. 
 
Fjármögnun áróðursmálaráðuneytisins er hrein snilld, því að hún er að mestu með sjálfbærum hætti. Landsmenn sem mega búa við þessi kerfisbundnu lagabrot eru sjálfir látnir greiða rekstrarkostnaðinn, með ofurgjöldum á unglinga jafnt og gamalmenni. Þá er rekstrarfélögum af öllu tagi gert skylt að greiða til áróðursmálaráðuneytisins, þótt ekki sé kunnugt um að félög hafi getu til að hlusta á útvarp eða horfa á sjónvarp. Jafnvel er gengið hart eftir að félög sem engan rekstur hafa haft árum saman sleppi ekki við að greiða til áróðursmálaráðuneytis ESB. 
 

»Samstaða þjóðar« hefur fundið fyrir óvönduðum vinnubrögðun RÚV.
»Samstaða þjóðar gegn Icesave« voru baráttusamtök gegn Icesave-kúgun evrópskra nýlenduvelda. Samtökin lifa áfram í félaginu »Samstaða þjóðar« sem hefur að markmiði baráttu fyrir fullveldisrétti almennings og sjálfstæði Íslands. Veigamikill þáttur í þeirra baráttu er andstaða við áframhaldandi veru Íslands í Evrópska efnahagssvæðinu (EES), sem frá upphafi var liður í áætlun um innlimun landsins í Evrópusambandið (ESB). »Samstaða þjóðar« er einnig staðföst gegn því afnámi lýðræðis sem birtist í tillögum hins ólöglega Stjórnlagaráðs. Í tillögunum birtast skýrt hugmyndir um formlegt afnám lýðræðis og þar með lýðveldis, í anda þeirra sem nefna sig gjarnan þingræðissinna. 
 
»Samstaða þjóðar« og þar áður »Samstaða þjóðar gegn Icesave« hafa fundið meira en smjörþefinn af vinnubrögðum áróðursmálaráðuneytisins. Ekkert hefur verið fjallað um yfirlýsingar þessara samtaka á RÚV. Kvörtunum samtakanna hefur hvorki verið svarað, við samtökin rætt, né úrbætur gerðar á umfjöllun RÚV. Stuðningur RÚV er staðfastur við stefnu ríkisstjórnarinnar að afsala sjálfstæði Íslands til ESB. Stuðningur RÚV hefur frá upphafi verið alger við Icesave-kúgunina og RÚV stundar áfram brot á útvarpslögunum. 
 
Ætla landsmenn að láta viðgangast mikið lengur að Ríkisútvarpið, sem á tyllidögum er nefnt »útvarp allra landsmanna«, hafi þá stefnu að: 

• Gæta EKKI fyllstu óhlutdrægni.
• Veita EKKI hlutlæga fréttaþjónustu.
• Halda EKKI í heiðri frelsi til skoðana.
• Vera EKKI vettvangur fyrir mismunandi skoðanir.

Þótt Áróðursmálaráðuneyti Evrópusambandsins hafi svona lengi liðist andstaða við hagsmuni almennings getur varla verið að þjóðin reki ekki af sér slyðruorðið og sendi flugumenn ESB innan RÚV til annarra starfa. Hvar eru eftirlitsstofnanir eins og Umboðsmaður Alþingis? Viðfangsefni þess embættis er »að hafa eftirlit með stjórnsýslu ríkisins og sveitarfélaga«. Umboðsmaður hefur fulla heimild til »að taka mál til meðferðar að eigin frumkvæði«. Hvað tefur Umboðsmann Alþingis við það verkefni að láta mikilvæga ríkisstofnun eins og Ríkisútvarpið fara að lögum?

    

Áróðursmálaráðuneyti ESB hefur þá stefnu

að svara engum kvörtunum frá andstæðingum ESB

og ábendingum um ítrekuð brot á útvarpslögum er látið ósvarað.

>>><<<